Urdaibai altxorra da jada: Guggenheimek ez dauka lekurik hemen.
Guggenheim museoaren bigarren egoitza egiteko proiektuak mehatxu larria egiten dio Urdaibaiko erreserbari, Bizkaian dugun balio itzeleko naturguneari. Helegitea aurkeztu dugu Ministerioak gune babestua murrizteko hartu duen erabakiaren aurka. Proiektua ezingo litzateke burutu, planteatu den moduan.
Edonork pentsa lezake “natura” eta “kultura” kontzeptuak ez daudela kontrajarrita, baizik eta elkar osatu beharko luketela. Hala ere, hori ez da horrela, Urdaibaiko Biosfera Erreserbaren bihotz-bihotzean Guggenheim Museoaren egoitza bi eraikitzen badituzte.
Kultura aitzakiatzat hartuta, proiektuak 61.000 m² baino gehiago okupatzea proposatzen du, nazioarteko babes-figura ugarik babestutako eremu batean. Urdaibaik Biosfera Erreserba izendapena dauka. Oka ibaiaren estuarioa Hezeguneei buruzko Ramsar Hitzarmenaren parte da. Mundaka-Gernikako itsasadarra Nazioarteko Garrantzia duen Hezegunetzat hartzen da, eta Murueta Natura 2000 Sarearen parte da. Babes-figura horiek guztiek administrazio guztiei ingurua egoera onean mantentzeko betebeharra ezartzen diete, baina badirudi kontrakoa egiteko ados jarri direla.
Harrigarriena eta ulergaitzena da Trantsizio Ekologikorako eta Erronka Demografikorako Ministerioaren jarrera. Izan ere, agindu ministerial baten bidez, kostaldeko babes-eremua 100 metrotik 20 metrora jaitsi du. Horrek Kostaldeei buruzko Legea urratzea eta boterea desegoki erabiltzea erakusten du, Ministerioa bere helburuen aurka ari delako, hau da, natura babestu eta trantsizio ekologikoan aurrera egitea. Helburu horri uko egiteaz gain, Muruetako ontziola (ustez aktibo ez dagoena) salbuetsi egiten du lurzorua berreskuratzeko eta deskutsatzeko erantzukizunetik.
“Honetan guztian, harrigarriena da Trantsizio Ekologikorako eta Erronka Demografikorako Ministerioaren jarrera; agindu ministerial baten bidez, kostaldeko babes-eremua 100 metrotik 20 metrora jaitsi dute.”
Itzelak izango dira museo horren eraikuntzak Urdaibaiko estuarioan eta gune babestuen habitatetan izango dituen eraginak. Gainera, behin eraikita, turistak erakartzeak sortuko dituen ondorioak areagotu ditzake. Urdaibai jada ur-hornidura arazoak dituen eremua da uda partean. Proiektuaren sustatzaileen arabera 140.000 bisitari gehiago ekarriko ditu, eta horrek arazoa areagotu besterik ez du egingo.
Arrazoi horiek guztiak direla eta, helegitea aurkeztu dugu ministerioaren erabakiaren aurka. Uste osoa dugu proiektu hori, planteatu den moduan, ez litzatekeela gauzatu behar.
Espero dugu ministerioak atzera egitea eta Kostaldeei buruzko legea urratzen duen agindu hori indargabetzea. Urdaibaik Doñanak adinako ingurumen-balioa du, eta bere babesa errespetatua izatea merezi du. Gainera, hain egoera bikainean dagoen kostalde gutxi geratzen zaigu. Administrazioek eta justiziak babestu egin behar dute.
